Rev 22 | WSK | STEP | Se engel mu ani marak ko yu mu aga kausam. Yu mu glass crystal iwita biliwilik makaso. Se yu mu Kaem se Sipsip Gotek ilak nunga daiga kuwim biya mu te aratukaso, ale nagukaso

Revelation of John 22

Marak ko yu se marak ko tam

1 Se engel mu ani marak ko yu mu aga kausam. Yu mu glass crystal iwita biliwilik makaso. Se yu mu Kaem se Sipsip Gotek ilak nunga daiga kuwim biya mu te aratukaso, ale nagukaso 2 tai wonong mu ko lage biya mu kusumuri namakaso. Se marak ko tam ilagala yu umutang ko norogen koma singsang sanamiwakasan. Tam mu yar suwanta ningi tom 12 ko nunguning kapa gilingisan, sige suwan suwan ningi nunguning kapa gilingisan. Se tam mu ko gawa mu ali lilim la ko kariimet nunga nungokko. ^{▼▼Rev 22:1-2 Marak ko tam: Gen 3:22-24. Ezekiel agotala yu se tam ko balam: 47:1-12.}

3 Mel memek aguwaya mu wonong mu ningi me anirukko. Kaem se Sipsip Gotek mu nunga daiga kuwim biya mu wonong mu ningi anirukko, se Kaem ko ura kariimet mu nup patawomonko. 4 Nuna noko koma motam aringimonko. Se noko nup mu nomoke sail te anirukko. 5 Turom bo umu te mena. Ale nuna worem ko nikim te me bagomon, agi galep bo kasomon ale ko nikim te me bagomonko. Mu awuk, Kari Biya Kaem mu nikim nungarukko. Se nuna tom suen biya ningi ali sor supuling ko bagomonko.

6 Se engel aninga maonam, “Den imi den nunguning se am ko nengemang ningi nunguning arukko. Kari Biya Kaem, nu ko den ko prophet alo nongomang te beteso se te balsan, mu nu ko engel bo beteram se tairam, ale ko ura kari alo mel aratukko pingi aram mu nunga kausam.”b

Jesus tairukko tom pingi aram

7 “Ikialko! Ani tairikko tom pingi aram!
Batoga imi te mel udagi aratukko mu baluwoso.
Se kariimet den imi karo tusan mu amilmilomonko.”

8 Ani John, den mel imi ani arigem ikiem. Ale den mel imi ari iki kutuwu saperem mu, ani engel mel imi aga kausam mu nup patawirikko suwik duap ningi dagulem.

9 Bare nu aninga maonam, “Suwuta me bitarko!” mam. “Ani mu ni se, nika sikisaki prophet alo, se kariimet suen la batoga imi ko den karo tusan, mu ninga turantala, ani Kaem ko ura kari. Se ni Kaem la nup patawurko!”

10 Ale nu aga maonam, “Ni batoga imi te mel udagi aratukko mu ko den aniso, mu me kaluwurko! Mu awuk, mel suen la aratukko tom pingi aram. ^{▼▼Rev 22:10 Tom pingi aram: Daniel 12:9.} 11 Awiriya munan memek bitawoso, mu am bita sagurukko. Se awiriya ikia memek bitawoso, mu am bita sagurukko. Aking awiriya munan ningo diram bitawoso, mu eng munan ningo umutang la bita sagurukko. Se awiriya laili kako bagoso, mu eng laili kako nunguning bagurukko.”

12 “Ikialko! Ani tairikko tom pingi aram!
Ani koma ago taisam,
ale kariimet suwan suwan nunga betera kaora te iki se nungarikko. ^{▼▼Rev 22:12 Jesus nanga betera kaora te iki se koma nangarukko: 1 Cor 3:12-15; Rev 2:23.}
13 Ani agata mu Alpha se Omega. Ani Duap se Nukum. Ani Gira se Udagi.”

14 Kariimet nunga guang anusan se karur mena, mu amilmilomonko. Nuna wonong biya mu ningi kasu nagumon ale marak ko tam mu ko nunguning namonko terong maman. 15 Bare kariimet nunga betera kaora memek biya, ale kariimet dawur kalosan, ale kariimet saman katagot betesan, ale kari mora se kuera ko kariimet, ale kariimet kaem kawel nunup patowasan, ale kawel kariimet, mu nuna wonong mu buring ko bagomonko.

16 “Ani Jesus, aninga engel beterem se namaram
ale mel suen la aratukko imi mu nina Kris alo ninga maonam.
Tam David mu ko Duap se ko Nukuri nunguningkiri mu anigita,
se ko Miri ko Gurek mu ani agata tala.
Se Ukira ko Baras nikinang kaposo mu ta anigita.” ^{▼▼Rev 22:16 Tam David ko Miri ko Gurek: Isaiah 11:1,10; Rev 5:5. Ukira ko Baras nikinang kaposo: Numbers 24:17.}

17 Se Korang Bur se Sipsip Gotek ko imet mu nuna balsan, “Tairko!” masan.
Se ni awiriya den imi ikisam mu balu, “Tairko!” meko.
Awiriya yu ko kueruk, mu nu am tairukko.
Se awiriya ko kueso, mu nu tairuk marak ko yu am naukko, ko diara bo mena.

18 Ani nina arikaya batoga imi te mel udagi aratukko mu ko den ko ikiwasan, mu ani den aora biya imi ninga manorsam: Awiriya den imi kunasuruk ale den saki saki ago te baluk, mu mel memek batoga imi te ko baluwoso mu suen la Kaem nu kumik te bitirukko. 19 Se awiriya Kaem ko batoga imi te den sang kututuwurok, mu nu Kaem ko Wonong Kako mu se, marak ko tam, batoga imi te ko baluwoso, mu nunga duap te me namurukko. Mu Kaem nu karuk se tagi taukko. ^{▼▼Rev 22:18-19 Den diram la anirukko: Proverbs 30:5-6.}

20 Se Kari nu mel suen biya aratukko den imi balukaso, ale iwita balam: “Mu ani tairikko tom pingi aram!” ma balam.

“Se mu butata. Kari Biya Jesus, ni tairko!”

Kari Biya Jesus ko gomang lila mu Kaem ko kariimet suen la nongorak bagurukko. Nunguning.

21